Gernikako Estatutuaren oroitzapenezko jardunaldia, Iura Vasconiae fundazioak antolatuta, IVAPekin eta EHUko Zuzenbide Fakultatearekin elkarlanean, urriaren 23an egindakoa —plebiszitu bidez onartu zeneko data baino bi egun lehenago—, arrakastatsua izan zen, bai hizlarien kalitateagatik, bai bertaratuen kopuruagatik. Hainbesteraino non ikasle, akademiko eta ordezkari politikoen parte-hartze handiak Zuzenbide Fakultateko gradu aretoaren ordez Donostiako campuseko Santa Maria zentroko auditorio zabalera aldatzera behartu baitzuen.
Iura Vasconiae fundazioko presidente Roldán Jimenok eta IVAPeko zuzendari Maite Barruetabeñak aurkezpena egin ondoren, bertaratuek autonomia estatutuen historia eta indarrean dagoen Gernikako estatutuaren sorrera errepasatu ahal izan zuten, gai horretan aditu handienetako baten eta, aldi berean, haren sorreraren koprotagonista den Gregorio Monreal irakaslearen eskutik. Santiago Larrazabal Deustuko irakasleak Estatutuan jasotako eskumenak xehatu zituen, zeinak kolore ezberdinetako gobernu zentralek tantaka transferitu dituzten. Juanjo Álvarez katedradunak ere autogobernuan aurrera egiteko formula posibleei buruzko argibide batzuk eman zituen, egungo esparrua gaindituz.
Maite Zelaia Zuzenbide Konstituzionaleko irakasleak moderatutako mahai-inguru atsegin bat ere interes handiz jarraitu zuten bertaratuek eta kargu aktiboen lehen lerrokoek, hiru kongresistarekin, senatari batekin, foru diputatu batekin eta batzarkide batekin, sentsibilitate politiko desberdinak ordezkatuz, adituek xehatutakoa ondo jaso baitzuten.
Gobernantza Publiko eta Autogobernuko sailburua. Olatz Garamendik itxi zuen ekitaldia, gogoratuz orain 44 urte bete direla Estatutua erreferendumean onartu zenetik eta epe luze horretan Estatuak lege organiko bat betetzeari uko egin diola eta oraindik ere transferentzia garrantzitsuak falta direla.
