Gernikako Batzar Etxeak UPV/EHUren Udako Ikastaroa hartu du: “Paktismoaren iragana, oraina eta etorkizuna. Historia eta politika mitoaz harago”; ikastaro horretan Bizkaiko Batzar Nagusiek ere laguntzen dute. Euskal Herriko Unibertsitate Publikoaren Udako Ikastaroen barruan kokatutako prestakuntza akademiko honek paktismoaren ideia eta praktika aztertu ditu, denboran zehar forma politiko gisa, Erdi Arotik gaur egunera arte. Lehen jardunaldian, Batzar Etxeko Liburutegian aurkeztu da bermeotar Fortún García de Ercillaren 1523ko “De pactis” liburuaren edizio bat, bai eta gure patrono Mikel Mancisidorrek prestatutako liburu horren edizio eguneratu eta kritikoa ere; azken hori Eusko Jaurlaritzako Gobernantza Publiko eta Autogobernu Sailak, IVAPek eta Iura Vasconiae Fundazioak argitaratu dute.
Unibertsitateko ikasleak, profesionalak eta Bizkaiko Batzar Nagusietako zein Aldundiko langile eta ordezkariak Batzar Etxean bildu ziren, gure presidente Roldán Jimenok aurkeztutako hizlariei jarraitzeko; hizlariek, hainbat une historikotan herrialdearen identitate juridiko-politikoa markatzen duen itunaren kultura honen ezaugarri bereizgarrienak aztertu zituzten. Ikastaroak paktismoaren irakurketa eguneratua proposatzen du, haren bereizgarri batzuk eta, agian, gaur egungo eta etorkizuneko potentzialtasuna identifikatzeko.
Ikastaroaren zuzendaritza Mikel Mancisidor de la Fuente-k, Deustuko Unibertsitateko Nazioarteko Zuzenbideko irakasleak, eta Itziar Lizeaga Romero-k, Bizkaiko Batzar Nagusietako letraduak, izan dute. Ikastaroan arloko adituak izan dira: Jon Arrieta (UPV/EHU), Iura Vasconiae Fundazioko ohorezko presidentea Gregorio Monreal Cia (Nafarroako Unibertsitate Publikoa), Andoni Artola Renedo (UPV/EHU), José Luis Aurtenetxe (Batzar Nagusietako letradu nagusi ohia, 1984-2017), Alejandro Saiz Arnaiz (Universitat Pompeu Fabra), Jesús Morales (Zaragozako Unibertsitatea), Xavier Gil (Universitat de Barcelona), Josu Erkoreka (Eusko Jaurlaritzako lehendakariorde ohia) eta Leire Irazabal Basabe (Euskal Herria Museoa).
García de Ercillaren De Pactis lanaren aurkezpena
Jardunaldiaren une berezi bat bermeotar Fortún García de Ercillaren lanaren aurkezpena izan zen: 1514an Bolonian argitaratua, Itunei buruz izenburupean, edo, jatorrizko latinezko bertsioan, De Pactis. Argitalpen honetan, Fortún Garcíak itunaren edukiak eta berezitasunak aztertzen ditu. Batzar Nagusiek, hain zuzen, obra honen edizio bat eskuratu dute, baina 1523koa. Lyonen Portonaris zigilu ospetsuak egindako edizio bikaina da, ziurrenik egilearen beraren gainbegiradapean. Ekitaldi berean obra beraren edizio moderno bat ere aurkeztu da, Mikel Mancisidor irakasleak itzuli eta iruzkin kritikoekin testuinguruan kokatua; Eusko Jaurlaritzako Gobernantza Publiko eta Autogobernu Sailak, IVAPek eta Iura Vasconiae Fundazioak argitaratua. Obra bera, bost mende tarteko bi ediziotan.
