Iñigo Urkullu lehendakariak Lehendakaritzaren egoitzan Iura Vasconiae Fundazioaren ordezkaritza bat hartu du. Ordezkaritzak Notitia Vasconiae Vasconiako historialari, jurista eta pentsalari politikoen hiztegia proiektua aurkeztu dio. Proiektua gehienbat amaituta dago jada, lau liburuki gaztelaniaz eta lehen bi liburukiak euskaraz eta ingelesez argitaratu ondoren, eta Eusko Jaurlaritzak eta Petronorrek kofinantzatu dute.
Euskal Herrian orain arte egindako argitalpen historiografiko osatuena da, eta K.a. 200. urtetik gaur egunera arte Vasconiako errealitate instituzional eta politikoaren konfigurazioan zuzenean parte hartu edo deskribatu zuten 1.199 autoreren lana biltzen du.
Akademiko batzuek “ziklopea” gisa kalifikatu duten zeregin hori posible izan da, Eusko Jaurlaritzaren eta Petronorren finantzaketari esker ez ezik, 39 unibertsitatetako 300 autoreren lankidetzari esker ere, hauek izan baitira sarrerak prestatu dituztenak. Lan hau, paperean argitaratzeaz gain, Fundazioaren webgunean erraz eta intuitiboki kontsulta daiteke: www.iuravasconiae.eus
Fundazioko ohorezko presidente Gregorio Monrealek; Hiztegiaren III. eta IV. liburukien presidenteorde eta zuzendari Juantxo Madariagak; eta idazkari Luis Eliceguik eskerrak eman dizkiote lehendakariari herrialde proiektu honetan izandako inplikazio eta laguntzagatik. Proiektu honek Euskal Herriko errealitate juridiko eta politiko konplexu eta berezira hurbiltzea erraztuko die, ez bakarrik akademikoei, baita gure historia politikoko gakoak eta protagonistak ezagutu nahi dituen edonori ere.
Lehendakariak, bere aldetik, oso positibotzat jo du Iura Vasconiae-ren ekimena eta haren irismena, eta Fundazioaren beste jarduera-eremu batzuk ezagutzeko interesa agertu du. Fundazioa erreferente funtsezko bihurtu da Vasconia osatzen duten zazpi lurraldeetako zuzenbidearen historiaren arloan.
