Karguak eta lanbideak
Historialaria eta legelaria
Ibilbidea
Britainiako Saint-Brieuc herrian sortu zen, François Germain Marie Habasque eta Amelie Modeste Bernardine Ducrest de Lorgerie senar-emazteen ezkontzaren fruitu, hainbat belaunalditan zuzenbidearen munduari eta justizia-administrazioari oso lotuta egon zen familia baten barruan. Izan ere, magistratuen semea eta biloba zen. 1872an, Jeanne Marguerite Bourgesekin ezkondu zen.
Habasquek 1849an hasi zituen ikasketak Nantesko Lizeoan, baina Angulema herrian amaitu behar izan zituen. Izan ere, Angulema herrian finkatu zen familia, familia-buruaren ibilbide profesionalari jarraiki. Ikasketa juridikoak, berriz, Rennesen egin zituen.
Lanbidez nagusiki beti Zuzenbidearen munduari lotuta aritu bazen ere, garrantzizkoa izan zen, halaber, Girondako historiari eta arkeologiari jarri zien arreta, erakunde historiko-juridiko batzuk barne.
Legeetako gizona izanik, abokatu jardun zuen eta, ondoren, justizia-administrazioan hainbat kargu bete zituen, hala nola magistratua, Bordeleko apelazio-auzitegiko kontseilaria, hainbat tokitan prokuradore inperialaren ordezkoa eta Agengo apelazio-auzitegiko abokatu nagusi, 1902an erretiroa hartu zuen arte. Historialari-lana hari aitortzeko, Girondako departamentuko Société des Archives Historiques elkarteko kidea izan zen, eta erakunde horrek ohorezko presidente eta Société Archéologique de Bordeaux elkarteko presidente izendatu zuen. Gainera, Union Historique et Archéologique du Sudouest erakundearen sortzailea izan zen, Frantzia hego-mendebaldeko hemeretzi eruditu-elkarte bildu zituena.
Era berean, 1882ko urtarrilaren 16ko Dekretuaren bidez, Frantziako Ohorezko Legioaren zaldun izendatu zuten.
Frantzia hego-mendebaldeari buruzko lan historiografiko zabal baten egilea da, eta haren lan askok oso tokikoak edo eskualdekoak izatea dute ezaugarri, baina beste gai batzuk ere aztertu zituen, garrantzi nabarmen handiagokoak. Esate baterako, gai honi heldu zion: Behe Erdi Aroan eta Aro Modernoan Kostaldeko Lau Hiribilduetako (San Vicente de la Barquera, Santander, Laredo, Castro Urdiales), Bizkaiko, Gipuzkoako eta Lapurdiko ordezkariek sinatutako elkarren onerako hitzarmenak, Frantziako eta Espainiako monarkien arteko gerra-aldietan nabigatzaileek egiten zituztenak, merkataritza-trafikoa bermatzeko. Hartara, saihestu egiten ziren gerra-deklarazioen garaian monarkiek ezartzen zituzten debekuak eta mugak.
Obrak
. «Entrée dans Agen et entrevue de Jeanne d’Albret et de son fils Henri de Navarre (13 janvier 1572)», Archives Historiques de la Gironde, 26 (1888), 550-552. or.
Le dernier duc d’Aquitaine: Xavier-Joseph-Marie de France, 1753-1754. Étude historique; suivie de la réimpression des Vers sur la naissance de Monseigneur le Duc d’Aquitaine… et de pièces justificatives inédites, Paris: Alphonse Picard, 1890.
«La domination de la reine de Navarre (Marguerite de Valois) à Agen en 1585», Bulletin du Comité des Travaux Historiques et Scientifiques. Section d’Histoire et de Philologie, 2-3 (1890), 226-256. or.
«Une visite épiscopale à Saint-Jean-de-Luz sous Louis XIV», Revue de l’Agenais. Bulletin de la Société d’Agriculture, Sciences et Arts d’Agen, XIX (1892), 470-479. or.
«Les traités de bonne correspondance entre le Labourd, la Biscaye et le Guipuscoa (archives municipales de Saint-Jean-de-Luz)», Bulletin Historique et Philologique (1894), 560-574. or.
«Une page de l’histoire du Labourd. Eléonore d’Autriche et la rançon de François I», Tradition au Pays Basque, 1899.
Episodes d’un procès en sorcellerie dans le Labourd au XVIIe siècle, Biarritz: E. Soulé, 1912.
Bibliografia
COURTEAULT, P., «Francisque Habasque (1842-1917», Archives Historiques de la Gironde, LI (1916), XVII-XLIII. or.
LAUZUN, Ph., «Francisque Habasque», Revue de l’Agenais. Bulletin de la Société d’Agriculture, Sciences et Arts d’Agen, XLIV (1917), 301-305. or.
WAGNER, R. (arg.), «Habasque, Francisque-Alexandre-Marie», Livre d’Or de la Gironde, Paris: R. Wagner editeur (1914), 283-284. or.
