Karguak eta lanbideak
Apezpikua eta kanonista
Ibilbidea
Burgosko Huérmeces herrian jaio zen 1590 aldera, gurasoak Pedro Díaz Fernández eta Francisca Zorrilla zituela. Zuzenbide kanonikoan doktoretza egin zuen Salamancako Unibertsitatean. Lermako duke, Ceako duke eta Belmonteko markes Cristóbal Gómez de Sandovalen semearen maisua izan zen, Filipe III.aren kapilau ere bai, eta Kordobako elizako errazio-emailea ere izan zen. Erregeak Jakako apezpikutzarako aurkeztu bazuen ere, eta gotzaindu bazen ere (1615), ez zuen egoitza hartu, Mondoñedoko apezpikutza hartu baitzuen. Ondoren Badajozera (1618-1627) eta Iruñera (1627-1637) joan zen. Mondoñedoko elizbarrutiko burua zela argitara eman zuen Constituciones synodales del Obispado de Mondoñedo (1618) lana, eta Iruñeko gotzaina zela ospea hartu zuen Sinodo erreformista bat bildu zuelako Garesen, arrakastarik izan ez zuena, kleroak aurka egin ziolako (1634). Lizarran hil zen 1637ko abuztuaren 13an, eta haren gorpuzkiak 1640ko apirilaren 20an Huérmeces herrira eraman zituzten, Fernández Zorrillatarren jauregiko kaperara.
Obrak
Constituciones synodales del Obispado de Mondoñedo / nuevamente hechas imprimir, y mandadas guardar por Don Pedro Fernández Zorrilla, Obispo y Señor de Mondoñedo, capellán de Su Majestad y de Su Consejo en la Synodo que se celebró el año 1617; van al principio las que se hallaron de Don Isidro Caja de la Jara, Madrid: Juan Sánchez, 1618.
Bibliografia
Cal Pardo, E., Episcopologio mindoniense, Santiago de Compostela: CSIC; Instituto de Estudios Gallegos, 2003, 437.-448. or.
Goñi Gaztambide, J., Historia de los Obispos de Pamplona, VII.Siglo xvii, Iruñea: Nafarroako Gobernua-EUNSA, 1987, 370.-498. or.
Jimeno Aranguren, R., «Fernández Zorrilla, Pedro (ca. 1590-1637)», in Peláez, M. J., eta Sánchez-Bayón, A. (zuzk.), Diccionario de canonistas y eclesiasticistas europeos y americanos (I). 1369 semblanzas del año 1000 al 2015, Saarbrücken: Editorial Académica Española-AV Akademikerverlag GMBH & Co. KG, 2012, 161. or.
Aipamen bibliografikoa
Jimeno Aranguren, R., “Fernandez Zorilla, Pedro”, Jimeno Aranguren, R., (dir), Notitia Vasconiae. Baskoniako historialarien, legelarien eta pentsalari politikoen hiztegia, T.I, Iura Vasconiae fundazioa, Donostia, 2020, p. 530.
